مواضيع فتكات المميزة

المواضيع المميزة التي تكتبها العضوات و تختارها الادارة لتميزها كل اسبوع

اقتراحات لتطوير الموقع

أفكار العضوات لتطوير موقع فتكات

قسم المواضيع المكررة

قسم خاص بالمواضيع التي تضاف و تكون هناك موضوعات مشابهة سابقة لها

ثقافة و معلومات

قسم الثقافة و المعلومات العامة و المتخصصة

السياحة و السفر

قسم خاص بالسياحة والسفر ومعلومات عن الدول و الاماكن السياحية

تعليم اللغات

منتدى خاص بتعليم اللغات الاجنبية

Foreign Fatakat

Fatakat topics in other languages

الكمبيوتر و الانترنت

حلول للمشاكل التي تواجهنا في الكمبيوتر و الانترنت و معلومات مفيدة عنهما

موبايلات

كل ما يتعلق بالموبايل من اخبار و برامج و موديلات

اخبار الكمبيوتر والانترنت

منتدى خاص بأخر أخبار الكمبيوتر والإنترنت

اخبار

جديد الاخبار و الاخبار العاجلة في مصر و العالم

صور

صور في كل المجالات (دون ان يكون فيها ما يغضب الله)

فيديو

منوعات فيديو و افلام (دون ان يكون فيها ما يغضب الله)

تسجيلات صوتية

صوتيات منوعة (دون ان يكون فيها ما يغضب الله)

نكت و طرائف

جديد النكت و الطرائف

منوعات

جديد الترفيه من الاخبار و المنوعات والصور من كل مكان

العاب و مسابقات

العاب و مسابقات ترفيهية

مستعمل (سكند هاند)

سوق المستعمل بين عضوات فتكات

عروض فتكات

عروض وخصومات فتكات

الاستثمار و اخبار الاقتصاد

تبادل خبرات العضوات في الاستثمار و الادخار و متاقشة تأثير الاخبار الاقتصادية عليهن

زهرات فتكات

عمرك اقل من 18 سنة؟ تعالي و دردشي مع صاحباتك في عالم زهرات فتكات!

إيمانيات الزهرات

نتعلم سويا ديننا واخلاقنا ونطور سلوكياتنا

شات زهرات فتكات

شات للزهرات فقط، ممنوع دخول الكبار :)

تعليم و مدارس

قسم معلومات عن المدارس وتجارب العضوات معها

ركن المخطوبات

قسم خاص للمخطوبات و مواضيع تهمهن

معاملة الازواج

مناقشات و نصائح عن معاملة الازواج سعيا لعلاقة زوجية سعيدة

طفولة وأمومة

صحة الطفل و كل ما يهمه من ازياء و العاب و تعليم و رعاية و تربية

صحة المرأة

مواضيع و مناقشات تهمك لصحتك حيث تهتم بتخصص النساء و الولادة

صحة العائلة

مجال الطب بصفة عامة لإفادة عائلتك وقاها الله و إياك كل شر

العيادة النفسية و التنمية البشرية

تعلمي كيف تنمين نفسك و مهاراتك و تتخلصين من المخاوف و العقد لحياة افضل!

الاعشاب و الطب البديل

فوائد الاعشاب و الثمار و كيفية التداوي بها و الطرق التقليدية للطب البديل

المنتدى الإسلامي

المواضيع الدينية و الفتاوى و الاستشارات

القرآن الكريم

انشطة حفظ القرآن الكريم و التفسير و التجويد

السنة النبوية

الاحاديث الشريفة و بيان الاحاديث الصحيحة و الاحاديث الموضوعة

الفقه الإسلامي

يتناول المسائل الفقهية والاحكام الشرعية المختلفة

صوتيات ومرئيات اسلامية

دروس ومحاضرات ومواد اسلامية

معهد اعداد داعيات فتكات

دروس ومحاضرات وواجبات منهج اعداد الداعيات

تفسير الاحلام

تفسير الاحلام بواسطة العضوات ذوات الخبرة في الاحلام

الترحيب و الاجتماعيات

الترحيب بالمشتركات الجدد و التهاني بالمناسبات المختلفة و التعارف

دردشة و مواضيع عامة

المواضيع العامة و الحوارات التي لا تندرج تحت المنتديات المتخصصه

فضفضة و تجارب

طلبات المشورة و ابداء الرأي في المشكلات و تجارب العضوات مع الحياة

قضايا مجتمعية

منتدي لمناقشة جميع القضايا المجتمعية التي تهم المرأة والأسرة بصفة عامة

فتوكات الدول العربية

ملتقى بنات وسيدات الدول العربية في فتكات

المغتربات

قسم خاص بالمغتربات لتبادل الأخبار و الخبرات والفضفضة

شات فتكات

ابدئي محادثة جديدة او شاركي في محادثة موجودة من قبل

اختر رقم الصفحة 1 2 3 4 5 6 7 8 9 33 الأخيرة >>

رد 0 0
0
فتكات ست الكل
التايهة والدلالة دليل  اماكن بيع المستلزمات الفنية(اسالى عن اى مكان وهتلاقى الاجابة)

١٠‏/٢‏/٢٠١٦
هوايات
السلام عليكم ورحمة الله وبركاته





ازيكم يا فتوكات النهارد ه جاتلى فكررة وخصوصا انا ببعت لكل فتوكة اقولها اشتريتيه منين وتوصفلى وجزاهم الله خير بجد فليه مش يكون الموضوع ده للجميع علشان الجميع يستفادواى واحده محتاجة تشترى حاجة ومش عارفة توصل تسئل هنا واكيد اللى عارفه هتجاوبها
وكمان اللى يعرف مكان ياريت يدخل ويكتبلنا عليه ويوصفهولنا كويس جدا وانا هابدا
بما انى من الزقازيق هاقول الاماكن اللى اعرفها فى الزقازيق

اولا الزقازيق


بصو فى الزقازيق اللى محتاج خرز او خامات اكسسوارات يروح لابن سينا وعنده كمان خيوط لاسيه جميله وه فى شارع المكاتب اكيد كلنا عارفينه
ولو محتاجين ايدينن شنط للى عاوز يعمل شنط كورشيه او مكرمية هاقولكم على ورشة خوص تحفة بجد وهى عند صيدلية النيل الشارع اللى جنبها
وكمان فى محل ببيبيع خيوط بالكيلو للمكرمية ورخيص بجد فى نفس الشارع
ولو عاوزين مستلزمات ديكور انزاوا عند حلقة السمك عند الممر
ولو محتاجين الوان اى نوع روحوا لمكتبة فنون عند كلية تربية نوعية
ولو محتاجين ناصبيان او ريليف او الوان برضوا فى مكتبة فى المحطة عند محطة القطار

ثانيا : القاهرة

بالنسبة للقاهرة هاقول اللى اعرف للى عاوز ورق الومنيوم اللى بيقولوا عليه اسطانيو وهو فن رقائق المعادن انزلوا فى الحسين واسئلوا عند بيت القاضى بجد منطقة خطيرة وفيها النحاس والفضة والالومنيوم بالكيلو

ولو محتاجين خيوط فموجود محلات جملة بالهبل فى الغورية ودى لو عاوز تروحيلها تركبى المترو وانزلى العتبة وخدى عربية رايحة الحسين من تحت الكوبرى وانزلى الغورية

ولو محتاجين صوانى او اى ادوات منزلية اركبى نفس العربية بتاعة الحسين وقوليله حمام التلات

وكمان انا سالت كرنبا عن محلات السلاسل والاكسسوارات فقالتلى الموسكى علشان تروحوا الموسكى بتركبوا المترو وتنزلى محطة العتبة وتتمشيها

ولو عاوزين محلات قشرة خطيرة للى بيشتغلو قشرة وهابئا افرجكم على شغلى انزلى شارع الرويعى ده برضو فى العتبة انا مسمية العتبة دى صندوق الكنوز بجد جواها كنوز

بالنسبة لدرب البرابرة انا عرفته بالصدفة من يومين وانا فى القاهرة
بصى انزلى محطة العتبة وخدى اتوبيس يكون مكتوب عليه الموسى وقوليله كوبرى الماشة بتاع الموسكى
هينزلك هناك اسئلى عن كنيسة وراها هناك درب البربرة ومليان نجف وورش

بالنسبه بقي للشمع تجيبيه منين فى الموسكى وشارع الجيش وفى محل اسمه سيد الخير
عنده كل حاجة للشمع والالوان كمان
وفة نفس الشارع هتلاقى
محلات الصباغة والالوان فى المحلات الكيميائية شــــــــــــــــارع الجيش - القاهرة
يوجد من أول شارع الجيش جميع محلات الخاصة بألوان الصباعة للأقمشةوهذا الشارع في اوله من ناحية شارع بور سعيد متخصص في كل انواع الصباغةوهذا يصلح للطباعة اليدوية والأستانسل للأقمشة


سوق للجلود
شارع بو سعيد - من ناحية مديرية أمن القاهرة - تحت الربع
وهتلاقى هناك
جلد الماعز ((( جلد الحور )) ...... يباع بالقدم
جلد البقري والجاموسي (( جلد الكورين )) ..... يباع بالقدم
وهناك ايضا يباع قصاقيص جلود ملونة تحفة ....... تباع بالكيلو






دول بئا كل الاماكن اللى الفتوكات اضافوها لينا فى المشاركة وتحية وتعظيم سلام لكا فتوكة وصفت لينا مكان الف الف شكر ليكم

في القاهرة Lost Cat وصلت أخيرا لمكان عجيب غريب اسمه الخرنفش..مليان مستلزمات خرز بأسعار جملة الجملة..بس ازاي يروحوه ما أعرفش بصراحة لأني مش من القاهرة..بس أعتقد انها قالت انها دخلته من درب البرابرة..اسألوها
لو عايزة منتجات شمع يعنى شمع خام والوان ومصلب وخلافه انزلى الغورية تحت باب زويلة عند العطارين اللي هناك وممكن كمان في محل اسمه ابو كحلة للعطارة ده في شارع احمد ماهر خلف مديرية الامن
ومتهيالى كمان فيه شمع جل واعرف ان شمع الجل في درب البرابرة عند حد اسمه تقريبا سمير خير

لو عايزة كلف واكسسوارات وحاجات عرايس من نجف او شمع او توزيعات انزلى درب البرابرة ده بين الازهر والموسكى الف مين يدلك عليه درب البرابرة دة هتلاقي فيه حاجات عجيبة تفتح نفسك للشغل

لو محتاجين نحاس رقائق نحاس بيت القاضى فى الحسين
ولو محتاجين اسلاك ورنيش ورا قسم الجمالية ولو عاوزين اسلاك نحاس عليها ورنيش
شارع نجيب الريحانى وسعر الكيلو 60 وده السعر الاصلى محدش يضحك عليكم

الجلد الطبيعى من تحت الربع ودى ورا مديريه امن القاهره وبره اسمها الخياميه وكلها منطقه واحده شارع بالطول وممكن تنزلى محطه جامع البنات عند المتحف الاسلامى قريب من باب الخلق ومن هناك ممكن تروحى الموسكى والغوريه وتحت الربع وكلهم عايزين انك تمشى كتير وتلفى كتير وربنا يوفقكم


درب المزاينه هتلاقوه عند المحلات اللي بتبيع حجات السبوع والتوزيعات
افضلوا اسالوا عن مكان بيع مستلزمات تغليف الهدايا لغاية ما توصلوا
هتلاقوه هناك في المحلات اللي بتبيع الخرز هتلاقو عندهم العيون المتحركه برموش ومن غير رموش
ولقيت هناك كمان الاقمشه اللي بتتغلف بيها بوكسات الهدايا وشرايط الستان والشرايط البلاستيك دي اللي بتتربط على الهديه
وبوكسات هدايا احجام مختلفه ولقيت كمان محلات بتبيع الاسفنج

محل كمان فى مدينة فيصل اسمه ديفليه لكن بيبيع حاجات بالجملة

محل ف وسط البلد ف شارع 26 يوليو بعد بنك فيصل الاسلامى بيبيع كل مستلزمات الخياطه والكلف والكنفا والتريكو اسمه محلات بوابيجيان بس هو مواعيدة رخمه شويه بيقفل الساعه 8 مساء والاجازو جمعه وسبت



لو عايزين قماش تنجيد او ستائر او ملايات او سواريهات انزلى وكالة البلح علي طول


لو عايزة منتجات شمع يعنى شمع خام والوان ومصلب وخلافه انزلى الغورية تحت باب زويلة عند العطارين اللي هناك وممكن كمان في محل اسمه ابو كحلة للعطارة ده في شارع احمد ماهر خلف مديرية الامن

ومتهيالى كمان فيه شمع جل واعرف ان شمع الجل في درب البرابرة عند حد اسمه تقريبا سمير خير

لو عايزة كلف واكسسوارات وحاجات عرايس من نجف او شمع او توزيعات انزلى درب البرابرة ده بين الازهر والموسكى الف مين يدلك عليه درب البرابرة دة هتلاقي فيه حاجات عجيبة تفتح نفسك للشغل
محل عطارة اسمه احمد ابو جبل لقيت عنده شمع خام تركى جبت كيلو ب12 جنيه قلت اجربه الاول بس هوا تحسوه طرى مش زى البرافين بتاعنا اهو يمشى هجرب واقولكم المحل ده جوة


انا فعلا لقيتها في الموسكي في مكان تقريبا اسمه كان درب المزاينه هتلاقوه عند المحلات اللي بتبيع حجات السبوع والتوزيعات
افضلوا اسالوا عن مكان بيع مستلزمات تغليف الهدايا لغاية ما توصلوا
هتلاقوه هناك في المحلات اللي بتبيع الخرز هتلاقو عندهم العيون المتحركه برموش ومن غير رموش
ولقيت هناك كمان الاقمشه اللي بتتغلف بيها بوكسات الهدايا وشرايط الستان والشرايط البلاستيك دي اللي بتتربط على الهديه
وبوكسات هدايا احجام مختلفه ولقيت كمان محلات بتبيع الاسفنج
فى محل خرز في أول الموسكي أمام محل النمرسي اسمه محل الحاج طه .... موجود عنده النوع ده من الكريستال بس غالي شوية





دول شوية عناوين مجمعاهم من منتديات ومواقع لاماكن محلات ربنا يجعله فى ميزان حسناتهم

الخليفة المأمون - مصر الجديدة
شركة ماستر الأيطاليه تليفون -فاكس 24852306 موبيل 0123101086


وفي شارع القصر العيني
شركة كرياتيف تاتش تليفون 27960599
وهي شركة ايطالية بتبيع خامات الديكوباج .... والنابكن (( المناديل الورقية ))
ومادة الكركليه السريعة - والوان الشمع - والبوسترات - والوان الجواش والزيت والأكريليك - وورق الطباعة بالتسخين - ومادة الكلاكتش (( بديل الغراء )) - وجميع الأكسسوارات الفنية..... جميع الخامات مستوردة


محل في أول الموسكي أمام محل النمرسي اسمه محل الحاج طه .... موجود عنده النوع ده من الكريستال بس غالي شوية




دى بئا محلات الزجاج
اولا
الزجاج النفخ (( الملون اليدوي ))
يباع في الجمالية - او خان الخليلي في أخر الشارع بجوار قهوة نجيب محفوظ
ثانيا
الزجاج العادي (( الزجاجات بجميع اجحامها )) للرسم علي الزجاج الخ .....
يباع في سوق الزجاج في منطقة العتبة بالقرب من محل صيدناوي الخزندارا المنطقة اسمها شارع الجامع الأحمر .... هناك هتلاقوا أشكال وألوان


دى خريطة الازهر خريطة مفيدة جدا جدا جدا ربنا يبارك لل كتبتها

انتي عندك شارع طويل اوي اوي بتاع الازهر والحسين ماشي الشارع ده اوله كوبري للعربيات واخره مستشفى الحسين فيه طريقين لو معاكي عربيه
يا اما تطلعي الكوبري بالعربيه وده هاينزلك قرب اخر الشارع
يا اما تلفي من تحت الكوبري وده هايخليكي تمشي في كل الشارع من اوله لاخره
خلينا من الطريق التاني واشرحلكوا هتلاقوا ايه كل ما تمشوا
اوك يعني احنا دلوقتي ماشيين من تحت الكوبري
هتلاقوا في الاول محلات اجهزه كهربائيه وتليفونات كتير على اليمين والشمال وبعدين تفضلوا ماشيين هتلاقوا محلات لشنط السفر عل اليمين وعلى الشمال وبعدين هاتفضلو ماشيين لحد ما تلاقوا مفترق طرق والطريق قدامكوا بقي 4 يعني يا اما تمشي على طول او تدخلي يمين او تدخلي شمال
ندخل يمين الاول هتلاقي محلات على الناصيه بتبيع شوية اكسسوارات للستاير وكمان الفوم بتاع المخدات والالحفه والناحيه التانيه شركة الهلال والنجمه بتاعة البلاستيك وجنبيها بأه كل انواع البويه اللي ممكن تتخيليها وباسعار مختلفه تماما عن المحلات
ماشي ده لو دخلنا يمين
طيب لو دخلنا شمال هتلاقي كوبري
ماشي الشمال ده بأه شارع كبير اوي
على اليمين هتلاقي شارع ضيق جدا اسمه جوهر القائد
الشارع ده مليان ادوات مكتبيه وهدايا ومستلزمات المكاتب وكله بسعر الجمله
والشارع ده اخره ........ بيوصل على الصاغه والحسين .
الشارع ده لما تمشي فيه هتلاقي فتحه على ايدك اليمين قدام شويه الفتحه دي توديكي على حمام التلات حمام التلات ده مليان للعرايس اللي بيجهزوا كل حاجة المطبخ وبرضه بأسعار حلوه اوي بس لازم تفاصلي طبعا
جميل
اما بقى لو دخلتي اول شمال
حاره صغيره جدا جدا جدااسمها حارة اليهود
دي بأه فيها العجب كل ديكورات البيت
حاجات كنت بالقيها في الفا ماركت بمبلغ وقدره هتلاقيها هناك بنص السعر بس امشي فيه شويه وانتي هتلاقي حاجات كتير جدا وبراويز وساعات وكل حاجه
خلاص كده خلصنا شارع جوهر القائد
المهم ده لو كنا دخلنا يمين
اما لو دخلنا شمال وعلشان تتدخلي شمال لازم تعدي من تحت الكوبري علشان الشارع اللي في النص مقفول بسور....هتلاقي الموسكي
على اول الناصيه هتلاقي شركة اسمها الوفاء والامل او النور والامل حاجه كده... دي عندها خيوط مصر البيضا وخيوط كروشيه وتطريز وعيشه بس كله بالجمله وزراير كمان وبعدين لما تدخلوا يمين هتلاقوا كل مستلزمات الخياطه من سوست لخيوط لكل حاجه وقدام شويه في النمرسي بس اسعاره غير بتاع المهندسين
المهم كده يبقى خلصنا يمين شارع الازهر وشمال شارع الازهر
نيجي بأه لو مشينا على طول
استنوا متمشوش بسرعه لان يعد ما تمشوا قدام شويه كده هتلاقوا شارع ضيق على ايديكو اليمين الشارع ده مليان اقمشة تنجيد وكمان قماش ملايات ولو دعبستو كده وخرمتو شويه كمان او سالتوا فين الاقمشه الحريمي هتلاقي كده حارات صغيره شويه مليانه اقمشه حريمي ورجالي وبسعر الجمله برضه ارخص من الوكاله وكمان هتلاقوا اقمشه رجالي كويسه هتلاقوا الصوف اللي بيتباع المتر في عمر افندي ب70 وب 80 جنيه هتلاقوه هناك ب 30 جنيه
المكان ده هو التربيعه وهو مكان اكتر من رائع وكمان ارخص حته فى مصر للقماش
ماشي
المهم نطلع بره تاني على الشارع وافضلو ماشيين هتلاقوا على الشمال ناس كده بتبيع الحفه وستاير وفيه فتحه هناك بتدخلك على حمام التلات تاني
افضلو ماشيين لحد ما هتلاقوا على ايديكو اليمين حته اسمها الغوريه
عندها كوبري بتاع مشاه
لو انتي على اليمين وعديتي الكوبري ده ونزلتي الناحيه التانيه اول ما تنزلي
هتلاقي محل كبير بتاع خرز وترتر
مليان خرز وترتر كل الاشكال والالوان والأسعار بالجمله تحفه وكمان عنده خيط حرير و أحيانا بيكون عنده خيط مصر البيضا

افتكرت حاجه كمان
عارفين جراج العتبه مش فيه تحتيه ناس بتبيع ساعات وموبايلات وكده
افضلي لفي مع الجراج هتلاقي محل بيبيع خيوط حرير لتطريز المكن وكمان قماش ايتامين وكمان مستلزمات الخياطه وكمان حاجات مستوره جاهزه للشغل خداديات وكلام من ده
,ولما تحبي تروحي بالتاكسي
فانتي هاتقوليله انا عايزه اروح الحسين وممكن تنزلي عند كوبري المشاه يعني تبداي من اخر الشارع لان في الغالب التاكسي مش هايرضى يمشي من تحت يعني هايطلع الكوبري وينزلك عند قدام كوبري المشاه ويبقى على يمينك الغوره وعلى شمالك الحسين تقومي لفه ومديه ظهرك للمستشفى بتاعة الحسين وتبقى الغوريه على شمالك والحسين على يمينك
وتعكسي الخريطه السابقة


الأكياس أم سوسته (( المشمع الشفاف )) هتنزلي حارة المزين الشارع ده أمام محل النمرسي اللي في الموسكي أسالي هناك ... فيه واحدة سيدة عندها مصنع أو رشة صغيرة ... بتقوم بتصنيع شنط شفاف بالسوسته أنا كنت بأعمل عندها شنط للألحفة والمفارش والستائر ... أسمها (( ورشة أم محمد )) متضحكيش

بالنسبة لطباعة (( البورشور )) الخاصة بأي مفروشات ... فيه سوق الورق وده شارع بيبدأ من ميدان باب الشعرية .... وشارع الجيش ...وينتهي عند العتبة وهو سوق كبير وشارع طويل ... هتلاقي هناك مطابع بتطبع الورق الكرتوني اللي انتي بتضفيه مع الكيس في الداخل ... وكمان العلب الكرتون اللي ممكن تحطي فيها المنتج الخاص بيكي و ممكن تعملي الديزاين الخاص بمنتجك علي واللوجو الخاص بالمنتج وتحمليه علي (( سي دي )) و بتعطيه للورشة ... وممكن هما في الورشة بيقوموا بالموضوع ده .

ممكن تستعملي بدل الشنط المشمع الشفاف ... ممكن استبداله بالبلاستيك الشفاف (( السليفوني )) سعر الكيلو 11 جنيه مصري .... المحل موجود في اخر حارة المزين للأسف معرفش أسمه بس لو سألتي وانتي هناك هيدلوكي ... أطلبي من صاحب المحل أوردر (( طلب )) بالمقياس اللي انتي عاوزاه وهو هيعملوا لكي
كما أن يوجد في شارع درب البرابرة (( محل اسمه الحمصاني للبلاستيك )) ده موجود عنده كل المقاسات وفيه اكياس لصق ذاتي (( سليفون )) وممكن برضوا يصنع لكي المقاسات اللي انتي محتاجها .... بس لابد من أن يكون الطلبية (( كميات ))





ثانيا : الاسكندريه

فيه سوق الورق في المنشية عند ميدان الجندى المجهول في الشوارع الجانبيه على اليمين ممكن تلاقى كل مستلزمات الاعمال الفنية (الوان -ورق-ستيكرز)
واشهر محل هناك اسمه (كمال سعد) اسعاره تحفه وعنده كمان الادوات المدرسيه بسعر الجمله

وفي كمان زنقة الستات عنوانها من ميدان الجندى المجهول برضوا
فيه محل اسمه رودى تدخلى من عنده لشارع فرنسا اول شارع بعد البنزينه
هو دة بداية زنقة الستات
كمان فيه ف الزنقه محلات ورد ولوازم البوكيهات وفه محل اسمه العقاد هناك فيه حاجات تحفه
وراها على طول سوق الخيط تلاقى كل مستلزمات من (الخياطة-الخرز-الاكسسوار-كلف الستاير)
واسعارهم معروفه للكل انها احسن اسعار بسسسس تفاصلى قوى معاهم
فيه محل للخيوط تحفة اسمه 6 اكتوبر موجود فى شارع خالد ابن الوليد
من ناحية ترام سيدى بشر تمشى من اول الشارع شويه
فيه شارع على ناصيتة جزار المحل فى نفس شارع الجزار ده
سورى مش فاكرة اسم الجزار بس المحل دورين واسعاره جنان

في منطقه اسمها الساعه ف كرموز فيها
(جميع انواع الاقمشه للستاير والملايات وكل المفروشات وهناك فيه الشراشيب بتاعت الستاير )
وهناك لازم تفاصلى جامد اوى احسن تتخمى

في محلات بجانب كلية رياض الاطفال تلاقى فيها (الكارتون-الطين الاسوانى- الالوان بكل انواعها-الالعاب التعليمية -الفوم-ورق الكريشة)
بس الاسعار اغلى شوية من سوق الورق عنوان الكلية فى مصطفى كامل
من شارع ابو قير امام معرض طارق للسيارات بجانب مدرسة هدى شعراوى

وخامات الشمع والوانه موجودة فى منطقة العطارين ودى من ميدان محطة مصر

في في زرارة..أنا كنت بجيب منه الأول شغل الخرز..أخر مرة نزلت زنقة الستات لقيت محلات كتير حاطة مستلزمات الأكسسوارات..و على فكرة لقيت السلك الرفيع هناك برضه في الزنقة..محل صغير كدة و بيبيع جملة..و عنده سلاسل و كل حاجة للأكسسوارات..زرارة هتلاقوه عند بوابة الأوقاف..في المنشية ادخلي البوابة و على ايدك الشمال هتلاقي المحل..بس فاصلي لأنه غالي أوي..و كمان ليه فرع تاني في الزنقة..و الأفضل الزنقة

فيه فى العطارين شارع كل المحلات بتبيع عطارة بس هى محلات قديمة قوى
تلاقى عندهم دم الغزال ومستلزمات السبوع وكمان عندهم الشمع والالوان الصناعيةوالطبيعية جربى تلفى واسألى عن المحلات دى
محل اسمه مكه اخر السور بتاع مستشفى جيهان بيبع كل شى للاكسسوار واسعاره نص اسعار الزنقه وااقل كمان الشارع ال فى وش اخر السور يدخلو فيه على اوله اسمه محل مكه وصاحبه اسمه الحج صلاح

شارع خليل حماده على القطار فى سنتر هشام للوازم الخياطةوأشكال كتير من الخرز والكلف

وكمان فى على عبد الناصر أمام مستشفى جيهان محل صغير اسمه ايفون للوازم الخياطة برضه








اختنا negm





رابعا: طنطا

محل اسمه طلبه (الطاء مضمومه) وده قرب ميدان السيد البدوي وده للخرز والترتر والاكسسورات وخلافه
وفي مكتبات متخصصه قدام كليه تربيه نوعيه لكل شيء بيعملوه جوه الكليه بس اعتقد غاليه برضه

وفي محل في شارع صغير قدام فندق عرفه مش فاكره اسمه بصي تقريبا حسين عامر ده بتاع خرز وستان وحاجات الاكسسوار والاستيكر اللي بيتلزق علي البضيهات والعبايات والتل وحاجات الخياطه كلها
واسعاره حلوه وهو محل مشهور اوي بس يارب يكون اسمه صح عشان كده
انا قولت هنزل بكره واجبلكوا المعلومات المؤكده

وفي محل في شارع النحاس بعد فندق دلتا سيتي مول في ادوات الرسم كلها وادوات الفنون الجميله
يعني هو بعديه بشويه

اما بقي الاقمشه وحاجات الستاير والخيش والفرو والحاجات دي في سوق اسمه سوق الفسيخ
بيتباع في الموالح في شوارع جنبه بيتباع في الاحذيه الشوارع دي
ما بين سوق الخشب وسوق الفسيخ وفي القطن الفيبر برضه وحاجاته اسعارهم حلوه


محل لبيع قماش الجوخ فى طنطا انا اشتريتو من سوق ناصر من محل اسمو برده فى أول دخلتك سوق ناصر من شارع الخان المتر انا اشتريتو ب 30 جنيه وده لاننا فى الصيف فى الشتا بيتباع ب 45 جنيه بس المتر عرضه مترين يعنى جيبى ربع او نص متر بس بصراحه انا يوم ماروحت اشترى كان فى مجموعه انصاص بألوان مختلفه اشتريتها كلها لما هتروحو هتلاقو فى توبين لونهم موف فاتح وكحلى ولما تروحو هيطلعلكم نوع خفيف قولولو لا عاوزين من التقيل وهو قال جيلو بضاعه من الصين قريب فيها كل الوان الجوخ ولو عاوزين تشترو اى نوع من المقاصات يبقا مافيش غير سنجر جمب ماركت حماد هتلاقو المقص اللى بيقص على هيئه زجزاج بس معرفش الاسعار


خامسا: المحله

لوازم الخرز موجوده في رفعت نور الدين ده بتاع لوازم خرز وعندة كل لوازم الاعمال الفنية دى
وتقريبا بيبيع بسعر جملة ده له فروع كتيره
له فرع فى العباسى الجديد فى الشارع اللى جمب مدرسة صفية زغلول
وله فرع عند العباسى القديم ورا اخوان خليل كده

وثانيا محل عاطف ده عنده برضو كل لوازم الخرزوالزرد والدبابيس وكله وعنده حاجات حلوة اووى
ده ورا اخوان خليل فى العباسى القديم برضو

سادسا: المنصوره

كل مستلزمات الخياطه وشغل الخرز وكل حاجه في شارع بورسعيد وشارع الخوجات والسكه الجديده

سابعا: السويس

هتلاقي مستلزمات الأكسسوارات في محل واحد بس..عند عم محمود..عارفة قصر الديكور..هتمشي في الشارع بتاعه لحد ما توصلي عند الحلواني بتاع الأدوات المنزلية كملي في الشارع هتلاقيه على ايدك الشمال محل من أوله لأخره ما شاء الله خرز

ثامنا:دمنهور

سوق الملوخية


شكر خاص لكل فتوكه شاركت باماكن في الموضوع
ومستنيه باقي الفتوكات عشان يبقي عندنا موسوعه بالاماكن اللي موجوده في كل مكان
وفي دورات وعناوينها في المشاركه دي


وكمان هنا جزء خاص بالدول العربية زى الكويت ولبنان والسعودية وقطر
112

يلا مستنياكم تقيموا الموضوع وتشاركونا لان بجد الواحد بيتعب علشان يرووح مكان
رد 204858 0
511

ayah22
فتكات متميزة

٩‏/٦‏/٢٠١٠ ٩،٢٥ ص
تم التقييم يا قمر وتسلمي يا رب على المعلومات الهايلة

rosalinda99
سوبر فتكات

٩‏/٦‏/٢٠١٠ ٩،٤٦ ص
تسلمى على النصيحة يا قمر

مديحة سليم
فتكات ست الكل

٩‏/٦‏/٢٠١٠ ١٠،٥٦ ص
ربنا يبارك فيك ياقمر افدتينى افادكم الله

***semsma***
فتكات ست الكل

١٠‏/٦‏/٢٠١٠ ٦،٠٥ ص
طيب ليه محدش شارك بمجالات يعرفها عاوزين يكون دليل المحلات الفنية فى مصر كلها

اناهو
فتكات نشيطة

١٠‏/٦‏/٢٠١٠ ٨،١٥ م
ربنا يبارك فيك ياقمر

BOAH
فتكات متميزة

١١‏/٦‏/٢٠١٠ ٣،١٦ م
ماشاء الله موضوع اكثر من رائع ياريت اللى تعرف عناوين محلات تانيه تدلنا

***semsma***
فتكات ست الكل

١٣‏/٦‏/٢٠١٠ ١٢،٠٩ ص
فين الناس؟؟؟؟؟؟؟؟؟؟؟
ليه مبتدخلوش تقولوا عناوين كل واحد وبلده

***semsma***
فتكات ست الكل

١٥‏/٦‏/٢٠١٠ ٨،٥٢ م
امبارح انا نزلت القاهرة ونزلت العتبة
وعرفت شوية معلومات
لشراء الشمع فى شارع اسمه شارع الجيش ده من العتبة هتلاقوا فيه جميع انواع الشمع وكيلو الشمع البرافين ب 8 جنيه بس

وعلشان تشترى سلالسل للعقود انزلوا الموسكى
او موسكى الحسين فيه هناك محلات
وكمان علشان تشترى ورق زينه انزلى الموسكى عند كوبرى المشاة هناك كنيسة وكميه كبيرة جدا من محلات الزينة ولف الهدايا اى حاجة هناك
وياريت نلاقى مشاركات اكتر من كده بجد الموضوع ده لو كلنا اشتركنا هيبئا احلى موضوع

***semsma***
فتكات ست الكل

١٦‏/٦‏/٢٠١٠ ٤،٣٦ ص
محدش ناوى يتبرع بعنوان

باربي المدللة
فتكات غالية قوي

١٦‏/٦‏/٢٠١٠ ١١،٥٨ م




عرض المزيد
اختر رقم الصفحة 1 2 3 4 5 6 7 8 9 33 الأخيرة >>
موضوعات مميزة

نتيجة مسابقة قسم النكت و الطرائف BACK TO SCHOOL  مسابقة موقف مضحك حصل ليكى و انتى صغيرة فى المدرس

النظام الدراسي المصري الجديد وصفة فاشلة مصممة للطبقة المرفهة

لا الحلم بيتحقق ولا قادرة ابطل احلم :(

طريقة عمل الريش الضاني بطريقة صحية ومغذية *( نسمة المؤمن )

❤ ◕‿◕ ❤نتيجة مسابقة قسم الصور صورة العام الهجرى الجديد 1441 ❤ ◕‿◕ ❤

من ام حمزه المصرى فراخ هندى بصوص الكاجو

تكريم مشتركات حملة نجمات الصيف 2019

لا قصة احكيها.......

طريقتي في عمل طبق عاشوراء (ليلي90)

مسقعه باذنجان بطريقه مختلفه مع نانا نزوله

باينة بالصوص الابيض والمشروم بيرو

اجمل واحلى قبعه حصريا على فتكات ولاول مره

منظمة المرأة العربية تعلن إطلاق بوابة إلكترونية لصاحبات المشروعات الصغيرة *( نسمة المؤمن )

فضل شهر الله المحرم وصيام عاشوراء

فتكات ها قد عدت و......العود اليكي يشبه الحياة ...امضي بيقين

طريقة عمل البامية باللحم الضاني والله زمااان *( نسمة المؤمن )

BACK TO SCHOOL تعالى يا فتوكة اشتركى معانا فى مسابقة موقف مضحك حصل ليكى و انتى صغيرة فى المدرسة

بين الكلمات بقلمي البرنسيس ارجوا ان تنال الرضا والاعجاب

❤ ◕‿◕ ❤ مسابقة صورة العام الهجرى الجديد 1441 ❤ ◕‿◕ ❤

عام هجري سعيد من تصميمي متحركه ومع البرنسيس كل عام وانتم بخير

مشرفات القسم
مراقبات القسم
الفتوكات المتواجدات
الزائرات المتواجدات