مسائكم فسفور سمك سنجارى ةجمبرى فى الفرن وكله بالصور

السلام عليكم ورحمة الله وبركاته

عاملين إيه يافتوكاتى

النهارده هقدملكم أكل يمى يمى سهلة وخفيفة وصحية وتجوعى بعد ماتاكليها بساعتين هههههه من كتر خفتها

سمك سنجارى / جمبرى في الفرن مع أرز أبيض

بسم الله

السمك السنجارى أنا إستخدمت سمك دنيس وقبل كده عملته بقاروص تقريبا الإتنين نفس الطعم طب لو مفيش الإتنين نعقد نفسنا أبدا ياقمرات ولا يهمكم السمك البلطى الكبير الطازج يفى بالغرض وهيبقى سكر بس يكون طازج أو سمك بورى اللى يريحكم

زوووم على عين السمكه ماشاء الله براقه علشان طازة

ودى السمكة كلها

و الجمبرى حجم وسط

المكونات / أولا تتبيلة السمك والجمبرى بعد غسلهم جيدا

توم / ملح / فلفل حار / كمون / ليمون / نعناع جربوا النعناع المفروم مع خلطة السمك تحفة وإدعولى

ده السمك الحلو بتاعنا ماشاء الله زى الفل هيتكلم هههه طبعا هنقول للراجل اللى هنشتريه من عنده نظفه للسنجارى يعنى إفتحه من الظهر مش من البطن ضرورى يابنات أو إنتوا إعملوا كده بنفسكم

التتبيلة بتاعتنا الحلوة هنتبل بيها السمك و الجمبرى ونسيبهم زى مانحب

بعد ماتبلنا السمك بتاعنا هنجهز الخلطة اللى هنحطها عليهم وهى واحدة وهنا في حاجة بسيطة جدا بعملها لكن بتفرق في الطعم في ناس بتعمل الخلطة عالبارد بس أنا بدبلها عالنار دقيقتين بتخلى الطعم أجمل جربوا مش هتندموا

الخلطة : بصل مقطع / فلفل ألوان مقطع طوليا أو مكعبات / فلفل حار /طماطم منزوعة البذور ومقطعه /كزبرة خضراء / ملح / فلفل/ بابريكا / كمون / ليمون / كزبرة خضراء وشبت أو إحداهما

في طاسة ومعلقة زيت عالنار نحط البصل الأول / الجزر المبشور / ثم الفلفل والطماطم والكزبرة لما نطفى عليهم علشان ماتفقدش طعمها كل ده تشويح بس يابنات ونتبلهم بملح وفلفل وكمون وليمون

هنوزع الخلطة دى عالسمكة السنجارى بعد مانحطها على ورقة فويل مدهونة بزيت وواخده شكل السمكة من بره والجمبرى نفس الحكاية في طاجن بايركس أو صينية هنحط طبقة من الخلطة وطبقة من الجمبرى وهكذا والإتنين هيدخلوا فرن ساخن وحار علشان السمك ماينزلش مايه كتير

السمك بياخد في الفرن نص ساعه وربع ساعه تحت الشوايه علشان اللون الحلو والجمبرى بينزل ميته لو عايزة شوربة زوديه مايه لكن لو عايزة طعمه مركز ومش زى المسلوق يبقى بلاش مايه

قدمته مع أرز أبيض أنا بفضل الرز الأبيض مع السمك اللى عليه خلطة لكن لو بتحبى رز ببصل بنى دى أذواق