لو خطيبك واحد من دول انفدي بجلدك يا بنتي

نصائح،مخطوبه،شك،رجل،عريس،فسخ

فترة الخطوبة هي فترة للتفكير في ما ستكون عليه الحياة فيما بعد والتعرف على الشخص بشكل اوضح في مواقف اكتر لانه ورغم معرفتنا ببعض ألا ان الانسان مش بيبان الا في المواقف المختلفة نبتدي نشوف الوجه الآخر (مخادع- بخيل- منافق-....) ووقتها اغلب الناس حوالينا بتقول كلمة واحدة يابنتي اتجوزيه وبعد الجواز ربنا يهديه
هنا بقي لازم نقول

الناس اللي بتنصح ديه مش هتعيش معاكي انتي ادري بنفسك هتقدري تتعايشي ولا لا
فيه اوقات بيكون فسخ الخطوبة خير وخير كبير كمان افضل من الانفصال بعد وجود ولاد
زي ما بنقول بالبلدي كده (قبل ما تقع الفأس في الرأس)
فيه شخصيات لا يمكن التعايش معها وطبعا كل بنوته ادري بنفسها وقدراتها زي ما بنقول (صوابعك مش زي بعضها)

1- الشخص الشكاك
ده شخص بيشك في صوابع ايده، هتلاقيه بيطاردك من باب انه غيران عليكي وكنتي بتكلمي مين ، وبتضحكي لمين ، وكنتي فين ومع مين واتاكد ازاي انك كنتي في المكان ده
فيه شعره بين الغيره والشك
الغيره دليل الرجولة والشك احساس بالنقص نابع من جوه الشخص
والنوعيه ديه متعبه جدااا جدااا

2- الشخص الأناني
وده شخص مش شايف غير نفسه وبس، كثير الحديث عن اماجده وبطولاته الزائفه، دائما ما يستغل هذا النوع حب من حوله للوصول إلى ما يريد، شخص شايف نفسه الشمس والكل بيلف حواليه
يفكر كيف يأخذ فقط
لا يعرف للعطاء معني

3- الشخص المهزوم البائس
هو شخص دائما حزين، يشعر وكأن العالم كله متفق علي تدميره، عايش دايما بروح المغامرة وان الناس كلها بتخطط لتدميره طول الوقت بيشتكي، لا يستطيع الانجاز ابدا لأنه يري انه محاصر بالاعداء

4- الشخص السلبي
او زي ما بنقول (ابن امه)
ننوس عين امه ده هتلاقي ماما داخله معاكي في كل التفاصيل البسيطة قبل الكبيرة وبتتحكم في كل حاجه واي حاجه، وكأن العلاقة الزوجيه أصبحت علاقة مثلثة من 3 أطراف ترأسها الأم عن طريق ابنها والعلاقة في هذه الحالة صعبه جدااا

5- الشخص البخيل
والبخل هنا ليس مادي فقط ولكنه يكون بخيل ايضا في مشاعره
حياته جافه محسوبة بعقلانية شديدة بالورقة والقلم زي ما بيقولوا

وفي الاخر ارجع وأقول ان ديه مش دعوه لهدم خطوبة ناجحه
ابدا ديه خطوة علشان نلحق اي زواجه ممكن لا قدر الله تفشل فيما بعد

وكمان مره بقول انتي ادرى واحده بقدراتك وصبرك وتحملك لان ربنا خلقنا مختلفين ممكن اللي اشوفه مستحيل غيري يشوفه عادي او زي ما بيقولوا (كل فوله ولها كيال)
ودمتم سعداء
يا أحلى فتوكات