هو أنا ذنبى ايه فى أب أو ام قاسين ، أنا مختارتش حد فيهم

دردشة و مواضيع عامة ١٨‏/١١‏/٢٠١٩ ١٢،٥١ م

بر الولدين,قسوة الوالدين,

ممن أصعب الأسئلة الى بتتسألى فى العيادة :
(هو أنا ذنبى ايه فى أب أو ام قاسين ، أنا مختارتش حد فيهم ، دول فرض عليا وكمان مطلوب منى أحبهم وارحمهم وهما مارحمونيش)!!

الحقيقة بتكون جملة صعبة أوى ، مابردش عليها بكلمات رنانة ودول أبوك وأمك ومهما عملوا تقبل ، لأ طبعا"
برد عليهم بحكاية أحمد....

أحمد كان جارى فى بيتنا القديم ، أكبر منى ب 6 سنين ، كنا بنحب نلعب على بصطة البيت سوا ونجرى سوا والدته توفت وهى بتولده وعاش والده يرعاه هو وبس ، لكن ماشفتش قسوة اب على ابن قد ماشفت قسوة أبو أحمد عليه..
خناق طول الوقت وزعيق ومهانة وصريخ فى وشه ، وكبر أحمد وأتخرج وأول حاجة عملها قرر الهجرة..

أبوة كان هايتجنن يهاجر إزاى!!!
فاكرة خناقتهم ع السلم وأحمد بيقوله خلاص جه اليوم الى أردلك كرهك وقسوتك هاسيبك هنا لوحدك ولو مت ياريت محدش يبلغنى مش هاجى حتى أدفنك...

وسافر أحمد ، وعاش والده وحيد بالفعل ، كانت ثيابه رثة طول الوقت وشارد وعاش سنين على الحال ده لحد ماتوفى بالفعل بعد هجرة أحمد بعشر سنين ، وأتدفن أبو أحمد لوحده ،أخته الوحيدة وجوزها تولوا دفنه وبعتوا لأحمد علشان يجى يستلم ميراثه من والده وجه أحمد وأستلم ميراثه الضخم الى الكل أتفاجئ بيه وأستلم جواب مضمونه الآتى :.

(إلى من كرهنى وأحببته ..
ابنى الوحيد الحبيب ، عارف إنك بتكرهنى ، بس والله عمرى ماحبيت قدك أنت وامك ، أبويا كان قاسى أوى عليا يا أحمد ، حرمنى من كل شئ ومن الفلوس لدرجة إنى رحتله وأمك بتولد أستلف منه فلوس مارضيش يدينى وماتت الغلبانة فى مستشفى حكومى بحمى نفاس..
مكنتش عايزك تشوف الى أنا شفته ، مارضيتش أجيلك مرات أب ، أنا انسان ليا إحتياجات غصب عنى دفنت كل شئ جوايا علشان أربيك ، غصب عنى قصرت فى حقك ، غصب عنى أتعاملت معاك غلط بس لازم تفهم إنه غصب يابنى وعدم فهم مش قصد خالص والله ، عمره ماكان قصد..
أتمنيت أشوفك قبل ما أموت لكن خطيئتى فى حقك دفعت تمنها بغربتك عنى ، ماهى الحياة كدة سلف ودين ، قسوت عليك بجهلى وأنت قسيت عليا بجهلك ، أنا مسامحك وبحبك وسبتلك الى يعيشك ملك ولو مراتك أو ولادك تعبوا فى يوم مش هايموتوا قصاد عنيك ياحبيبى..
سامح أبوك على جهله وعجزه )..:heart:

فاكرة كويس أحمد وهو قاعد على السلم بيعيط وبيلطم زى العيال الصغيرة. .

بيعيط على انه فهم متأخر..
فهم أبعاد النفس البشرية..
فهم سرها..
سرها الى كلنا مش عارفين نفهمه..
مش عارفين نفهم إن جوه كل واحد وجع ، ألم ، حزن ،خوف ، ساعات بيخلوا تصرفاتنا غير مفهومة وغير مرتبة...
ارحموا كركبة القلوب...
ابوك وامك دول بشر ، زيك زيهم ، محتاجينك ترحمهم وتعذرهم ، ترحمهم مش علشان هما ابوك وامك بس لأ..
ترحمهم لأن ده حقنا على بعض كا بشر.
حقنا نرحم بعض..
نهون الرحلة على بعض..
نستخبى فى حضن بعض من لخبطة المشاعر وقسوة الأيام والخوف الى بيبلع روحنا جواه...

هونوا الرحلة على بعض..
هونوها قدر الامكان
صباح الخير و السعادة و الرحمة

Via Nevine El Husseiny